எல் நினோ தாக்கமும் இலங்கை எதிர்கொள்ளும் காலநிலை அனர்த்தங்களும்

கட்டுரை | அருள்கார்க்கி | படம் | Pexels

உலகளாவிய ரீதியில் பசிபிக் பெருங்கடலில் ஏற்படும் அசாதாரண வெப்பநிலைப் பரவல், மனித வரலாற்றின் மிகக் கொடிய காலநிலை நெருக்கடிகளைத் தோற்றுவிக்கும் உந்துசக்தியாக மாறியிருக்கின்றது. புவி வெப்பமயமாதலின் தீவிரமடைதலுடன், எல் நினோ-தென்னக அலைவு (ENSO – El Niño Southern Oscillation) எனப்படும் இந்த இயற்கை நிகழ்வு, தற்போது வெறுமனே ஒரு பருவகால மாற்றமாக அன்றி, வளரும் நாடுகளின் தேசிய பொருளாதாரங்களையும் சமூகக் கட்டமைப்புகளையும் சிதைக்கும் பேரழிவாக உருவெடுத்துள்ளது. இந்தியப் பெருங்கடலின் மூலோபாய மையப்பகுதியில் அமைந்துள்ள தீவு நாடான இலங்கை, அதன் தனித்துவமான புவியியல் இருப்பிடம் மற்றும் மட்டுப்படுத்தப்பட்ட பொருளாதாரக் பின்னடைவுத் திறன் காரணமாக, எல் நினோவின் தீவிரத் தாக்கங்களுக்கு ஆளாகும் முதன்மை வலயங்களில் ஒன்றாகக் காணப்படுகின்றது.

இலங்கையைப் பொறுத்தமட்டில், பேரழிவு அபாயக் குறைப்பு (DRR – Disaster Risk Reduction) என்பது இப்போது தற்காலிகமான நிவாரணப் பணிகளுடன் சுருங்கிவிட முடியாது. அது தேசியக் கொள்கை வகுப்பாக்கத்தின் மையப் பொருளாகவும், அறிவியல் பூர்வமான தழுவல் உத்திகளை (Adaptation Strategies) உள்ளடக்கியதாகவும் மாற வேண்டிய கட்டாயத்தில் உள்ளது. சர்வதேசத் தரத்திலான தரவுகளையும், காலநிலை அவதானிகளின் அறிவியல் கண்டுபிடிப்புகளையும் அடிப்படையாகக் கொண்டு, எல் நினோவினால் இலங்கையின் விவசாயம், நீர்வளம், பொருளாதாரம் மற்றும் சுகாதாரம் ஆகிய துறைகளில் ஏற்படும் சவால்களையும், அவற்றுக்கான அரச கொள்கை சார்ந்த ஆயத்தநிலை மற்றும் சர்வதேச ஒப்பீடுகளையும் ஆழமாகப் பகுப்பாய்வு செய்ய வேண்டியது இன்றைய காலத்தின் தேவையாகும்.

எல் நினோ மற்றும் லா நினா: உலகளாவிய காலநிலை இயக்கவியல்

எல் நினோ மற்றும் லா நினா ஆகிய இரு நிலைகளும் பசிபிக் பெருங்கடலின் மேற்பரப்பு வெப்பநிலை மற்றும் வளிமண்டல அழுத்த மாறுபாடுகளின் இரு துருவங்களாகும். இவை ஒட்டுமொத்த உலகளாவிய வானிலை அமைப்பையும் கட்டுப்படுத்தும் பிரதான காரணிகளாக விளங்குகின்றன.

எல் நினோ (El Niño) , லா நினா (La Niña)
வழக்கமான காலங்களில், பசிபிக் பெருங்கடலின் கிழக்கிலிருந்து மேற்கு நோக்கி வீசும் காற்று வெப்பமான மேற்பரப்பு நீரை இந்தோனேசியா மற்றும் ஆஸ்திரேலியாவை நோக்கிய மேற்குப் பகுதிக்குத் தள்ளுகின்றன. இதனால் தென்னமெரிக்காவின் பெரு (Peru) கரையோரப் பகுதிகளில் குளிர்ந்த, ஊட்டச்சத்துக்கள் நிறைந்த நீர் கீழ்நோக்கியிருந்து மேல்நோக்கி எழும்புகின்றது (Upwelling).

இருப்பினும், எல் நினோ நிலவும் காலப்பகுதியில், இந்த  காற்று பலவீனமடைகின்றன அல்லது அவற்றின் திசை மாறுகின்றன. இதன் விளைவாக, மத்திய மற்றும் கிழக்கு பசிபிக் பெருங்கடலின் மேற்பரப்பு நீர் அசாதாரணமாக வெப்பமடைகின்றது. இந்த வெப்பநிலை உயர்வு உலகளாவிய வளிமண்டல ஓட்டத்தை (Walker Circulation) மாற்றி அமைத்து, உலகெங்கும் தீவிர வறட்சியையும், சில பகுதிகளில் வரலாறு காணாத வெள்ளப் பெருக்குகளையும் ஏற்படுத்துகின்றது.

லா நினா என்பது எல் நினோவிற்கு நேர் எதிர்மாறான ஒரு காலநிலை நிகழ்வாகும். இக்காலப்பகுதியில், மேற்கு நோக்கிய  காற்று வழமையை விடவும் அதிகளவில் பலமடைகின்றன. இதனால் மத்திய மற்றும் கிழக்கு பசிபிக் வலயத்தின் கடல் மேற்பரப்பு நீர் வழமையை விட மிகக் குளிர்ந்த நிலையை அடைகின்றது. இது ஆஸ்திரேலியா, இந்தோனேசியா மற்றும் தெற்காசியப் பகுதிகளில் அதிக மழைவீழ்ச்சியையும் வெள்ளப் பெருக்குகளையும் தோற்றுவிக்கும் அதேவேளை, தென்னமெரிக்கக் கரையோரங்களில் கடுமையான வறட்சியை ஏற்படுத்துகின்றது. இந்த இரு நிலைகளும் இந்தியப் பெருங்கடல் இருமுனையுடன் (IOD – Indian Ocean Dipole) தொடர்புபடும்போது, தெற்காசியக் பிராந்தியத்தின், குறிப்பாக இலங்கையின் பருவமழை முறைகளில் பாரிய குழப்பங்களை ஏற்படுத்துகின்றன.

சர்வதேச ரீதியான எல் நினோ பாதிப்புகள்

எல் நினோவின் தாக்கங்களை உலகளாவிய ரீதியில் உற்றுநோக்கும்போது, அதன் பாதிப்புகள் பிராந்தியத்திற்குப் பிராந்தியம் மாறுபட்ட வடிவங்களை எடுப்பதைக் காண முடிகின்றது. இலங்கையின் சவால்களைப் புரிந்துகொள்வதற்கு இந்த சர்வதேச ஒப்பீடு மிகவும் அவசியமானதாகும்.

சர்வதேச காலநிலை ஆய்வு நிறுவனங்களின் (உதாரணமாக, NOAA மற்றும் ஐரோப்பிய ஒன்றியத்தின் Copernicus சேவை) தரவுகளின்படி, அண்மைய தசாப்தங்களில் பதிவான மிகத் தீவிரமான எல் நினோ ஆண்டுகள் (2015/2016 மற்றும் 2023/2024) உலகளாவிய மொத்த உள்நாட்டு உற்பத்தியில் (GDP) பல பில்லியன் டாலர்கள் இழப்பை ஏற்படுத்தியுள்ளன. பிலிப்பைன்ஸ் மற்றும் இந்தோனேசியா போன்ற நாடுகள் முன்கூட்டியே வறட்சி எச்சரிக்கை அமைப்புகளை நிறுவி, நீர்ப் பங்கீட்டு முறைகளைச் சீரமைத்ததன் மூலம் விவசாய இழப்புகளை ஓரளவிற்குக் குறைத்தன. இந்த சர்வதேச அனுபவங்கள், இலங்கை போன்ற தீவு நாடொன்றுக்குத் தயார்நிலை உத்திகளின் அவசியத்தை வலியுறுத்துகின்றன.

இலங்கையில் எல் நினோவின் தாக்கம்

இலங்கையின் காலநிலை பிரதானமாக இரு பருவமழைகளை அடிப்படையாகக் கொண்டது: தென்மேற்குப் பருவமழை (யால பருவம் – மே முதல் செப்டம்பர் வரை) மற்றும்  வடகீழ் பருவமழை (மகா பருவம் – டிசம்பர் முதல் பெப்ரவரி வரை). எல் நினோ நிகழ்வானது இந்த இரு பருவமழைகளின் இயல்பான பொழிவையும் கடுமையாகப் பாதிக்கின்றது என்று இலங்கையின் காலநிலை அவதானிப்புத் திணைக்களம் (DoM) மற்றும் சர்வதேச ஆய்வுகள் சுட்டிக்காட்டுகின்றன. எல் நினோ நிலவும் ஆண்டுகளில், தென்மேற்குப் பருவமழைக் காற்று பலவீனமடைகின்றது. இதன் காரணமாக, இலங்கையின் மத்திய மலைநாட்டிற்கும் தென்பகுதிக்கும் கிடைக்க வேண்டிய மழைவீழ்ச்சி கணிசமாகக் குறைகின்றது. இது ‘யால’ பருவ விவசாயப் செய்கையை நேரடியாகப் பாதிப்பதுடன், நாட்டின் பிரதான நீர்த்தேக்கங்களின் நீர்மட்டத்தையும் குறைப்பதாக காலநிலை ஆய்வாளர் கலாநிதி லாரல் டி சில்வா தனது ஆய்வறிக்கைகளில் குறிப்பிட்டுள்ளார். ஆச்சரியப்படத்தக்க வகையில், எல் நினோ ஆண்டுகளின் இறுதிப் பகுதியில் (அக்டோபர் – டிசம்பர் இடைப் பருவமழைக் காலத்தில்) இலங்கையில் சில நேரங்களில் வழமையை விட அதிக மழைவீழ்ச்சி பதிவாகின்றது. வளிமண்டல அழுத்தக் குறைவுகள் காரணமாக ஏற்படும் இந்த திடீர் மழையானது, வறட்சியால் வரண்ட நிலங்களில் கடுமையான வெள்ளப் பெருக்கையும் நகர்ப்புற உட்கட்டமைப்புச் சிதைவுகளையும் ஏற்படுத்துகின்றது. இந்தத் திடீர் காலநிலை மாற்றங்கள் (Climate Extremes) விவசாயிகளுக்குப் பயிர் முகாமைத்துவத்தில் பாரிய நிச்சயமற்ற தன்மையை உருவாக்குகின்றன.

காலநிலை மாற்றத்தினால் ஏற்படும் அதிர்ச்சிகள் இலங்கையின் சமூக, பொருளாதார மற்றும் சுற்றுச்சூழல் அமைப்புகளில் சங்கிலித் தொடரான தாக்கங்களை ஏற்படுத்துகின்றன.இலங்கையின் தேசிய உணவுப் பாதுகாப்பிற்கு முதுகெலும்பாக விளங்கும் உலர் வலய நெற்செய்கை எல் நினோ வறட்சியினால் நேரடியாகப் பாதிக்கப்படுகின்றது. மகாவலி போன்ற பிரதான நீர்ப்பாசனத் திட்டங்களின்கீழ் உள்ள காணிகளிலேயே நீர்ப் பற்றாக்குறை ஏற்படும்போது, சிறு குளங்களை நம்பியிருக்கும் விவசாயக் குடியேற்றங்களின் நிலை இன்னும் மோசமாகின்றது.மறுபுறம், நாட்டின் பிரதான ஏற்றுமதிப் பொருளாதார ஈட்டமான தேயிலைச் செய்கை வெப்ப அலைகளினாலும், நீண்ட வரண்ட காலநிலையினாலும் பெரும் பாதிப்புக்குள்ளாகின்றது. குறிப்பாக, மலையகப் பகுதிகளில் நிலவும் அதிக வெப்பநிலை தேயிலைக் கொழுந்துகளின் தரத்தைக் குறைப்பதுடன், பயிர்களைத் தாக்கும் பீடைகளின் பெருக்கத்தையும் அதிகரிக்கின்றது. இது சிறுதோட்டத் தேயிலை உற்பத்தியாளர்களின் வருமானத்தை முடக்கி, ஒட்டுமொத்தப் பெருந்தோட்டச் சமூகத்தையும் பொருளாதார ரீதியாகப் பாதிக்கின்றது.

இலங்கை இன்னும் கணிசமான அளவில் நீர்மின் உற்பத்தியிலேயே (Hydro power) தங்கியுள்ளது. சமனலவெவ,  விக்டோரியா, ரந்தெனிகல போன்ற பிரதான நீர்த்தேக்கங்களின் எல்லைகளில் நீரேந்துப் பகுதிகள் வறட்சியடைவதால், தேசிய மின்சாரக் கட்டமைப்பு பெரும் நெருக்கடியைச் சந்திக்கின்றது.  இதேவேளை, நிலத்தடி நீர்மட்டம் வேகமாகச் சரிவடைவதால் யாழ்ப்பாணம் போன்ற குடாநாட்டுப் பகுதிகளிலும், உலர் வலயத்தின் ஏனைய மாவட்டங்களிலும் குடிநீருக்கான தட்டுப்பாடு தீவிரமடைகின்றது. கிணறுகள் வற்றுவதுடன், எஞ்சியிருக்கும் நிலத்தடி நீரில் உவர்த்தன்மை (Salinity) அதிகரிப்பதும் அண்மைக்கால அவதானிப்பாக உள்ளது. நீண்ட வறட்சி நிலவும் காலங்களில், இலங்கையின் தேசிய வனப் பூங்காக்கள் மற்றும் காப்புக்காடுகளின் எல்லைகளில் காட்டுத்தீ ஏற்படும் அபாயம் அதிகரிக்கின்றது. மேலும், வனப்பகுதிகளில் நீர் நிலைகள் வற்றுவதால், காட்டு யானைகள் உணவிற்காகவும் நீருக்காகவும் கிராமங்களுக்குள் ஊடுருவும் போக்கு தீவிரமடைகின்றது. இது  யானை -மனித மோதலை’ (Human-Elephant Conflict) மேலும் உக்கிரமாக்கி, மனித உயிரிழப்புகளுக்கும் காணி மற்றும் சொத்து அழிவுகளுக்கும் வழிவகுக்கின்றது.

அனர்த்த  அபாயக் குறைப்பு (DRR) மற்றும் இலங்கையின் அரச கொள்கைகள்

இலங்கையில் அனர்த்த முகாமைத்துவத்திற்கான சட்டரீதியான பின்னணி 2005ஆம் ஆண்டின் 13ஆம் இலக்க அனர்த்த முகாமைத்துவச் சட்டத்தின் (Disaster Management Act) மூலம் நிறுவப்பட்டது. இதன் கீழ் அனர்த்த முகாமைத்துவ மத்திய நிலையம் (DMC) மற்றும் தேசிய கட்டிட ஆராய்ச்சி நிறுவனம் (NBRO) போன்ற கட்டமைப்புக்கள் இயங்கி வருகின்றன.

இருப்பினும், தற்போதைய அரச கொள்கைகள் பெரும்பாலும் “அனர்த்தம் நிகழ்ந்த பின்னரான நிவாரணப் பணிகளை” (Reactive Approach) மையமாகக் கொண்டவையாகவே இருக்கின்றனவே தவிர, “முன்கூட்டியே அபாயத்தைக் குறைக்கும்” (Proactive Approach) உத்திகளில் போதிய கவனம் செலுத்துவதில்லை என்ற விமர்சனம் பரவலாக உள்ளது. காலநிலை அவதானிப்புத் திணைக்களம் வழங்கும் எல் நினோ எச்சரிக்க தரவுகள், விவசாய அமைச்சு, நீர்ப்பாசன திணைக்களம் மற்றும் மின்சார சபை ஆகியவற்றுக்கு இடையே உடனுக்குடன் பகிரப்பட்டு ஒருங்கிணைந்த திட்டங்கள் வகுக்கப்படுவதில் தாமதங்கள் நிலவுகின்றன. தேசிய வரவு செலவுத் திட்டத்தில் அனர்த்த அபாயக் குறைப்பிற்கான நீண்டகால தழுவல் முதலீடுகளை விட, அவசரகால வரண்ட காலப் பகுதிக்கு குடிநீர் விநியோகிப்பதற்கே அதிக நிதி செலவிடப்படுகின்றது. மாகாண மற்றும் பிரதேச செயலக மட்டங்களில் எல் நினோ போன்ற நீண்டகால காலநிலை நெருக்கடிகளை எதிர்கொள்வதற்கான பிராந்திய ‘தழுவல் திட்டங்கள்’ (Local Adaptation Plans) இன்னமும் முழுமையாக நடைமுறைப்படுத்தப்படவில்லை.

 இலங்கை எல் நினோவின் அச்சுறுத்தல்களைத் தாங்கி, மீண்டெழும் திறனுள்ள (Resilient) நாடாக மாற வேண்டுமாயின்,  அறிவியல் பூர்வமான உத்திகளைத் தேசியக் கொள்கையாக மாற்ற வேண்டும்.   சரியான நேரத்தில் துல்லியமான வானிலை முன்னறிவிப்புகளை வழங்குவதற்கு ஏதுவாக, செயற்கைக்கோள் தரவுகள் மற்றும் நவீன காலநிலை மாதிரிகளைப் (Climate Modelling) பயன்படுத்த வேண்டும். எல் நினோ உருவாக்கம் பெற்று வருவதை 3 முதல் 6 மாதங்களுக்கு முன்பே துல்லியமாகக் கணித்து, விவசாயிகளுக்குப் பயிர்ச் செய்கை காலத்தை மாற்றுவதற்கான ஆலோசனைகளை வழங்க வேண்டும்.நெல் ஆராய்ச்சி நிறுவனங்கள்  மூலம் வறட்சி மற்றும் அதிக வெப்பத்தைத் தாங்கி வளரக்கூடிய குறுகிய கால நெல் ரகங்களை உலர் வலய விவசாயிகளிடம் பரவலாக்க வேண்டும்.சொட்டுநீர்ப் பாசனம் (Drip Irrigation) மற்றும் தெளிப்புநீர்ப் பாசனம் போன்ற நவீன முறைகளை ஊக்குவிப்பதன் மூலம், விவசாயக் காணிகளில் வீணாகும் நீரின் அளவைக் பெருமளவு குறைக்கலாம்.இலங்கையின் பாரம்பரிய சிறு குளங்களின் வலைப்பின்னலை முறையான அறிவியல் அடிப்படையில் புனரமைப்பதன் மூலம் வறட்சி காலத்திற்கான நீரைச் சேமிக்க முடியும்.

குடிநீர், விவசாயம் மற்றும் மின் உற்பத்தி ஆகிய மூன்று தேவைகளுக்கும் இடையில் நீரைப் பகிர்ந்தளிப்பதற்கான முறையான முன்னுரிமைக் கொள்கையொன்று (Water Allocation Policy) உருவாக்கப்பட வேண்டும். வறட்சி தீவிரமடையும் போது, முதலாவதாகக் குடிநீருக்கும், இரண்டாவதாக விவசாயத்திற்கும், மூன்றாவதாகவே மின் உற்பத்திக்கும் நீர் பயன்படுத்தப்படுவதை இக்கொள்கை உறுதி செய்ய வேண்டும்.வறட்சியினால் முழுமையான பயிர் இழப்பைச் சந்திக்கும் சிறுவிவசாயிகளைப் பாதுகாப்பதற்கு, முறையான ‘காலநிலை காப்புறுதித் திட்டங்களை’ (Climate Risk Insurance) அரசு அறிமுகப்படுத்த வேண்டும். இது விவசாயிகள் மீண்டும் கடன் சுமைக்குள் சிக்குவதைத் தடுத்து, அவர்களின் வாழ்வாதாரத் தொடர்ச்சியை உறுதி செய்யும்.

இலங்கையிலும் சர்வதேச ரீதியிலும் உள்ள முதன்மை காலநிலை அவதானிகளின் ஆய்வுகள், எல் நினோவின் மாறுபடும் தன்மையை உறுதி செய்கின்றன.International Water Management Institute இலங்கையில் மேற்கொண்ட ஆய்வுகளின்படி, எல் நினோவினால் ஏற்படும் வறட்சியானது நிலத்தடி நீர் மட்டத்தை மாத்திரமன்றி, மண்ணின் ஈரப்பதனையும் (Soil Moisture) பெருமளவு பாதிக்கின்றது. இதனால் பயிர்களின் வேர் மண்டலங்கள் பாதிக்கப்பட்டு, நீண்டகால விளைச்சல் வீழ்ச்சி ஏற்படுகின்றது.மறுபுறம், இலங்கை மத்திய வங்கியின் வருடாந்த அறிக்கைகளின் தரவுகளை ஆய்வு செய்யும்போது, எல் நினோ நிலவிய 2016 மற்றும் 2023ஆம் ஆண்டுகளில் நாட்டின் விவசாய வளர்ச்சி வீதம் எதிர்மறைப் பெறுமானங்களைப் பதிவு செய்துள்ளதைக் காண முடிகின்றது. இது ஒட்டுமொத்த உள்நாட்டு உற்பத்தியின் (GDP) வீழ்ச்சிக்கும், உணவுப் பணவீக்கத்தின் (Food Inflation) அதிகரிப்பிற்கும் நேரடி காரணியாக அமைந்துள்ளது என்பதைப் பொருளாதார ஆய்வாளர்கள் சுட்டிக்காட்டுகின்றனர்.

முடிவுரை

இலங்கையில் எல் நினோவினால் ஏற்படும் தீவிரக் காலநிலை மாற்றங்கள் என்பது வெறும் தற்காலிக சுற்றுச்சூழல் பிரச்சினை அல்ல; அது நாட்டின் இறையாண்மை, உணவுப் பாதுகாப்பு மற்றும் பொருளாதார நிலைத்தன்மையுடன் பிணைக்கப்பட்ட ஒரு தேசிய பாதுகாப்பு அச்சுறுத்தலாகும்.இனிவரும் காலங்களில், வெறும் அனர்த்த மேலாண்மையுடன் நின்றுவிடாமல், உலகளாவிய ‘செண்டாய் அனர்த்த அபாயக் குறைப்பு கட்டமைப்பிற்கு’ (Sendai Framework for DRR) இணங்க, இலங்கையின் அரச கொள்கைகள் மறுவடிவமைப்பு செய்யப்பட வேண்டும். அறிவியல் பூர்வமான தரவுப் பகுப்பாய்வு, நவீன தொழில்நுட்பக் கையாளுதல் மற்றும் அடிமட்ட சமூகங்களின் பங்களிப்பு ஆகியவற்றை உள்ளடக்கிய ஒரு விரிவான தேசிய தழுவல் உத்தி மாத்திரமே, எதிர்கால எல் நினோ அனர்த்தங்களில் இருந்து இலங்கையைப் பாதுகாத்து, ஒரு நிலையான எதிர்காலத்தை நோக்கி வழிநடத்த முடியும்.